الكورة هي آخر معاقل الكفاءة فالمغرب! من بعد عقود ما ولى العناوين الوحيدة فالمملكة، باش توصل، هي "الطاعة" و"حني الراس" و"حويطة حويطة" و"باك صاحبي".
● أشرف حاكيمي
نهار 4 نونبر 1998 تزاد فاسبانيا، اللي غلبها ليوما هو وصحابو.
باه ومو جاو ف 1980 ل "Getafe" نواحي مدريد هربانين من قلة الشي.
الاب من "واد زم" والأم من "القصر الكبير".
الاب هز السلعة يبيعها فالزناقي والأم مسحات الدص عند اللي يسوى واللي ما يسواش.
ومن بعد تلاها أشرف في مدارج الكرامة ومدرجات Paris Saint-Germain كا يبوس رأس مو اللي رباتو على الأنفة والنضال.
● حكيم زياش
باه ومو خرجو من "تافاغولات" في اتجاه هولاندا، نهاية الستينات. كبر حكيم وسط ٩ ديال لخوت ولخواتات، شاف لويل من بعد ما مات باه قدام عينيه وهو فعمرو 10 سنين.
جوج خوتو لكبار دخلو للحبس والتهمة الشفرة والاحتجاز.
الأسرة الزياشية عتقها نظام التغطية الاجتماعية والشوماج والدولة الهولندية الحامية والمحترمة لكرامة مواطنيها والمواكبة ليلهم في لحظات الهشاشة والضعف.
طبعا كاين وحد الكازاوي، ولد الناس، سميتو عزيز ذو الفقار، لاقاتو الاقدار الاهية بزياش وعتق الولد.
ذو الفقار هو أول لاعب مغربي يحترف في الدوري الهولندي الممتاز.
● عبد الحميد الصبيري
تزاد ف 1996 ف گلميمة.
الشبه بين طاطا وگلميمة قد يصل لحد التطابق، غير هو كان عندو الزهر مشا لألمانيا وفعمرو 3 سنين، بينما عداد ديال الشباب اللي كا يشبهوه فالموهبة في نواحي طاطا، زاكورة، وارززات، تنغير، الريصاني، محاميد الغزلان.. مالقاو اللي يديهم حتى لسوس يحضرو ماتش ديال الكوكب مع حسنية أكادير!
الصبيري عاش في هوامش فراكفورت جميع انواع الفقر والفاقة والخصاص وملي بدا يلعب تبليسا ودار عملية وگلس للارض.
نهار وقع الكونترا المهمة ديالو مع FC Nuremberg
قال للصحافة:
"الله شحال انا فرحان، أخيرا نقدر نخلص الكرا ديال الدار ديال لواليدين ديالي وعلاش لا نشري ليهم دار".
● ياسين بونو
اللي ثقف مرمى المنتخب المغربي ليوم تزاد في كندا (Montréal) باه من تاونات، مهندس دولة واستاذ فالمدرسة الحسنية.
الاب والابن حتى واحد فيهم ما قال "كان أبي" بجوج قالو "ها كندا".
● نقول ليكم بكثير من المحبة والانتماء لبلادي المغرب ورغبتي الدائمة، والتي لا تتزعزع انه يتقدم، أن قيم جل المؤسسات والادارات والمقاولات المغربية، اللي هازا الراية وكا تدير الاشهار ب"المونديال"، هي نقيض قيم المنتخب ومن صنعو مجده اليوم.
● عداد ديال الدول المتخلفة سياسيا وحقوقيا، بحالنا، كان كأس العالم فال وفاتحة خير عليها وانتاقلات (بحال اسبانيا ودول من امريكا اللاتينية) الى الديمقراطية الحقه وخاص حكام المغرب يفهمو ويستوعبو الدرس ويستغلو الفرحة الجماعية باش يقلبو اللعب كيما قلبو وليد الرگراگي اللي وصل للربع في كأس العالم أو يستامرو في نفس اللعب الصغير اللي مخلينا فالمرتبة 123 من مؤشر التنمية البشرية!
لهم الاختيار ولحكيمي وزياش والصبيري والرگراگي.. ومن يشبههم من بنات وأبناء الشعب القرار.
#الله_يدينا_فالضو
0 التعليقات
